BALAOAN, LA UNION – Nasayaat iti kasasaad dagiti mula a tobacco idiay ili ti Balaoan, La Union, segun kenni Mr. Celso Oslec Oreal, Coordinator ti Trans-Manila Incorporated (TMI) Balaoan Satellite Training Center.
Nupay kasta, apektadoda met gapu iti panagngato ti labor ken cost of materials, ken kas sungbat, adda ti maaw-awat dagiti tobacco farmers a subsidiya kas iti abono ken benepisio manipud iti Lokal a Gobierno.
Iti agdama, agbalor ti agingga ₱105 iti Tobacco ti TMI a nababbaba maiyarig idi napalabas a tawen.
Para kenni Mr. Oreal, umdas daytoy a presio tapno sungbatan iti pagkasapulan dagiti farmers, agsipudta adda ti maaw-awatda a subsidiya.
Mapatta-patta a dumanon ti 630 hectares iti pakabuklan a ektarya a namulaan ti tobacco idiay Balaoan nga addaan ti nasurok 600 farmers, bayat nga iti TMI ket addaan ti 300 hectares ken 389 farmers.
Limmawa met dagiti pagmulaan ken ad-ado dagiti nagmula ita a tawen maiyarig idi 2025. Maysa a rason a makitkitana ditoy ket iti insentibo nga ipapaay ti LGU, malaksid pay kadagiti subsidiya.
Kabayatanna, mangnamnama ni Oreal nga agtultuloy iti panagmulaan ti tobacco.###
