Inpila ni House Majority Leader Ferdinand Alexander “Sandro” A. Marcos ti House Bill No. 8190 wenno ti singasing nga “Anti-Road Rage Act”, a panggep nga ibilang a krimen iti road rage ken mangipakat ti nadagdagsen a dusa kontra iti agresibo ken reckless driving.
Segun kenni Marcos, nalawag nga isina ti nasao a singasing dagiti gagangay a panaglabsing iti trapiko ken inggagara nga aramid a mangipaay-peggad iti biag ken sanikua.
Iti sidong ti singasing, ti road rage ket aniaman nga inggagara ken agresibo nga aramid ti drayber wenno sakay ti lugan mainaig iti insidente ti trapiko nga addaan panggep a mangbutbuteng, mangipangta wenno mangdangran, ken mangpataud iti nalawag a peggad iti biag wenno sanikua. Karaman kadagitoy iti napeggad a panagmaneho, panangbutbuteng babaen iti lugan, ken panangipangta wenno panangraut mainaig iti panagsupiat iti kalsada.
Mabalud ti innem a bulan ken maysa nga aldaw aginggana maysa a tawen wenno mamulta ti ₱20,000 aginggana ₱100,000 dagiti napaneknekan a nagbasol.
Ngumato ti dua aginggana uppat a tawen a pannakaibalud wenno multa a ₱100,000 aginggana ₱200,000 dagiti nakadadael iti sanikua wenno nakadangran.
Maipila iti kaso kas intentional felony babaen ti Revised Penal Code nga addaan ti kangatuan a dusa ken kanayunan a multa a ₱200,000 aginggana ₱500,000, malaksid pay iti civil liability no agresulta iti road rage ti nakaro a pannakadadael wenno pannakatay.
Malaksid ditoy ket maipasidong ti anger management training dagiti napaneknekan a nagbasul nga inkeddeng ti korte, kadua ti MMDA ken PNP.
Maipatungpal iti kangatuan a dusa no addaan ti usar wenno impakita a paltog wenno makapatay nga armas, no menor de edad, masikog, senior citizen wenno person with disability iti biktima, wenno no uniformed personnel iti karaman.
Dagus met a masuspende iti lisensia ti akusado kabayatanan iti imbestigasion ti kaso ken naan-anay a ma-revoke no napaneknekan a nagbasol bayat nga automatiko a maibabawi iti lisensia nga agimet ti patlog.
Iti nasao a singasing, ti PNP, iti pannakitinnulong ti MMDA, LTO, LTFRB ken DOJ, ket masapul nga agaramid kadagiti implementing rules and regulations iti uneg ti 90 nga aldaw manipud iti bileg ti linteg, nga ag-epekto ti 15 nga aldaw kalpasan a maipablaak.###
