BR LA UNION – Nag-isyu iti Land Transportation Franchising and Regulatory Board (LTFRB) Region One Office, ti show cause order para iti bus operator ken conductor a nag-viral iti video idi Mayo Uno, Labor Day, gaputi maipagarop a saanna a panangited ti sukli ken discount iti estudiyante a pasahero.
Segun iti uploader ti nasao a video, nagbalin nga arogante ken nagkedked a mangipaay ti umiso a sukli ken diskwento ti conductor .
Kas sungbat iti nasao a video, nangituding ni LTFRB Regional Director Cristal R. Sibayan ti hearing wenno panagdengngeg ti kaso inton Mayo 8, agdama a tawen.
Naki-koordinar metten ti opisina iti uploader para iti pammalubos na a mausar ti video para iti imbestigasyon ken naimbitaran pay a dumar-ay ti nasao a hearing.
Na-endorso metten ti insidente iti Land Transportation Office (LTO) para iti posible a panangipataw ti adminitrative penalty, partikular iti lisensiya ti conductor kalpasan ti due process.
Kabayatanna, napakdaaran dagiti operators ti Public Utility Vehicle (PUV) a sumurot kadagiti terms and condition ti Certificate of Public Convergence iti amin a kanito kas iti panang-aplikar dagiti nasayaat a kababalin ken panangipaay ti diskwento kadagiti estudyante, PWDs ken Senior Citizens.
Sumango met ti penalties dagiti saan a sumurot, kas koma iti fine ken suspension iti Certificate of Public Convergence.
