BR LA UNION – Namaris iti pannaka-rambak ti panag-piyesta ti ili a Bagulin babaen iti tallo nga aldaw a Kaykay Festival 2026.
Naluktan ti selebrasyon babaen ti fun run idi bigat kalman, Marso 19 ken simmaruno iti naduma-duma nga aktibidad, kas ti panaglukat ti Agri-trade fair, Sportsfest, ken Battle of the Bands idi rabii.
Naitampok pay iti umuna nga aldaw ti Kaykay Festival iti tradisyunal a panagluto ti Pinikpikan, inaramid ti lokal a gobyerno a kompetisyon a nakipasetan dagiti 10 nga ili, a pakaibilangan ti Cambaly, Cardiz, Suyo, Alibangsay, Baay, Dagup, Tio-angan, Libbo, Tagudtud ken Wallayan.
Adda agur-uray a premyo para iti siasinuman a mangabak iti tradisyunal a panagluto ti pinikpikan, nga agtaud iti pondo ti munisipyo.
Segun kenni Juvy Sagapan, Municipal Agriculturist ti Bagulin, linuktan da met idi kalman, ti Agri-Culture Trade Fest a nakaiparangan iti naduma-duma a bukod a produkto dagiti barangay, a mangipaay ti gundaway kadagiti lokal a mannalon a mangiplastar ken mangilako iti bukodda a produkto.
Nasaludsod pay kenni Sagapan nu anya ti nagdumaan ti Buybuy Festival ti ili a Burgos ken ti Kaykay Festival ti Bagulin.
Sungbat ti Municipal Agriculturist, agpada iti konsepto ngem ti Kaykay Festival ket nakaipokus iti finished product wenno nalpasen a produkto a soft broom wenno walis tambo.
