BR LA UNION – Nangiruar ti Provincial Government of La Union babaen kenni Gov. Mario Eduardo C. Ortega ti Executive Order No. 9, series of 2026 maitunos iti direktiba ni Presidente Ferdinand R. Marcos Jr. a mangilatag kadagiti addang tapnu matulungan dagiti umili a makissayan ti nadagsen nga epekto iti sangsangwen a krisis ti pagilian, gapwanan ti timpuar a gubat idiay Middle East.
Gaputi daytoy, nabukel ti Provincial Energy Security, Conservation, and Crisis Response Task Force a tumulong kadagiti umili iti tengnga ti agtultuloy a panagngato ti presyo dagiti produkto petrolyo.
Buklen ti task force iti komite, a mangkita iti epekto ti krisis, ag-monitor iti presyo, kangrunaan ti market surveillance, regulation, fuel consumption, ken information dissemination.
Daytoy ket tapnu masigurado a natalged dagiti umili kontra kadagiti aggundaway iti sitwasyon, partikular iti panagbaliw ti presyo dagiti magat-gatang agraman dagiti produkto petrolyo.
Al-allukoyen ti gobyerno probinsiyal iti amin, nga agsalimetmet iti enerhiya ken impasigurado ti provincial government iti agtultuloy a panakikoordinar da kadagiti nadumaduma nga ahensiya ken panagpatungpal ti programa a mangsungbat kadagiti pagkasapulan dagiti Elyukanos kangrunaan dagiti mannalon, mangngalap, ken dagiti pampubliko a drayber agraman dagiti small business owners.
