BR LA UNION – Mabalin itan a maala dagiti driver a saan pay a nakaawat ti fuel subsidy, iti payout babaen ti panagrehistroda iti QR code.
Segun iti Land Transportation Franchising and Regulatory Board (LTFRB), iti daytoy a wagas saanen a kasapulan a personal nga agturong dagiti driver iti opisina ti ahensiya tapno agparehistro.
Babaen iti daytoy, agtultuloy a makaipaay ti ahensiya iti tulong kadagiti drivers ken operators iti tengnga ti nangato a presyo ti petrolyo a mangap-apektar iti adu a pagbiagan.
Immuna nga inwaragawag ni Transportation Secretary Giovanni Lopez a nasurok a 245,000 a driver ken operators iti pampubliko a transportasyon iti intero a pagilian ti maka-awat ti fuel subsidy iti intero a pagilian mangrugi inton Marso 24.
Makaawat dagiti benepisyaryo iti payout a P1,500 agingga iti P10,000 depende iti klase ti PUV.
