BR LA UNION – Nagballaag ti Presidential Communications Office (PCO) nga awan ti santuen ti gobyerno iti panangkamat dagiti agiwar-waras ti “fake news,” partikular dagiti malisyoso nga impormasyon seknan iti First Family ken iti salun-at ni President Ferdinand Marcos Jr.
Segun kenni PCO Acting Secretary Dave Gomez, mangipatungpal ti gobyerno ti “zero tolerance policy” kontra kadagiti indibidwal wenno grupo nga agparparbo ti istorya tapno agisaknap ti kina-salawasaw ken kaawan ti talek iti gobyerno.
Kinuna ni Gomez nga awan ti mapaboran ken mapagsungbat iti linteg ti amin nga adda iti likod dagiti pammadakes.
Ti ballaag ket kasaruno dagiti nakita a posts iti social media nga agiwar-waras ti biddut a report seknan iti estado ti salun-at iti Presidente ken isyu a pakairam-ramanan ti First Family.
Impaganetget ti sekretaryo a dagiti nasao a klase ti disinformation ket saan laeng a personal a panang-perdi ngem ketdi pangta iti seguridad ti pagilian.
Iti agdama, aktibo nga aggar-garaw ti PCO Anti-Fake-News Desk, kadwa ti Department of Justice (DOJ) ken National Bureau of Investigation (NBI), tapno maamwan dagiti source ken peddlers kadagiti nasao nga impormasyon.
