BR LA UNION – Tinamaan ti serye ti airstrikes iti Kharg Island idiay Persian Gulf, sumagmamano nga oras sakbay nga agleppas ti inyetnag a deadline ni U.S. President Donald Trump para iti Iran – a lukatan ti Strait of Hormuz.
Maibasar iti report ti Iranian media, napipigsa a panagbettak iti nangngegan iti isla a kangrunaan a terminal ti langis ti pagilian, a dumal-dalanan iti dandani amin nga oil exports ti Iran.
Nailadawan ditoy dagiti panagatake kas coordinated strikes manipud iti aw-awagan da nga “American-Zionist enemy.”
Napuskol nga asok ti nakita manipud isla, a nabayagen a maibil-bilang kas “crown jewel” ti oil infrastructure ti Iran.
Kagiddan daytoy, impadamag ti Israeli military a nalpasdan ti dakkel nga operasyon maibusor iti nadumaduma nga “infrastructure sites” idiay Iran.
Karaman kadagiti natamaan ket ti maysa a rangtay asideg idiay Qom ken maysa pay a railway bridge idiay Kashan, a nakatayan ti dua ken nasugatan ti tallo.
Maipalagip nga idi Marso, imbaga ni Trump a “totally obliterated” ti U.S. forces dagiti military targets idiay Kharg Island, ngem pinilida a saan a dadaelen dagiti pasilidad ti lana.
Iti baro a panagraut kas addaan ti dakkel nga escalation a mabalin a mangsinga iti sangalubongan a suplay ti lana ken mangpakaro iti agdama a krisis idiay Middle East.
