BR LA UNION – Napilitan dagiti sumagmamano a mannalon idiay Benguet nga ipadawat laengen dagiti apit da a nat-nateng gaputa napaay da nga ilako, gapwanan ti nangato a presyo ti langis a ginubway ti riribok idiay Middle East.
Adu a nateng ti naiturong idiay La Trinidad Vegetable Trading Post ngem bassit dagiti aggatang.
Gaputi dayta, sumagmamano a mannalon iti nagdesisyon nga ipadawat laengen iti apit da, kabilang ti Pechay Baguio.
Kinuna dagiti mannalon a nasakit man iti nakem da, ngem awan ti maaramidan da.
Nagbalin a padagsen kadagiti mannalon iti nangato a presyo ti krudo a nang-padakkel ti gastos iti transportasyon, labor, ken taraon.
Segun iti maysa a trading association idiay La Trinidad, bagsak presyo ti nateng agsipudta naggi-giddan a nagapit dagiti mannalon ngem nakissayan iti gat-gatangen dagiti trader.
Manipud iti sigud a 10 tonelada, lima a tonelada laengen iti gat-gatangen dagiti traders.
Mainaig ti daytoy, nangisayangkat ti panagtataripnong iti Department of Agriculture kadwa dagiti stakeholder iti industriya ti nateng idiay Benguet.
Maysa kadagiti naisingasing a solusyon ket rehabilitasyon dagiti storage facility tapno adda pagidulinan kadagiti sobra nga apit ken in-inut a maiturong idiay Metro Manila.
