Nagpanawagan ti Philippine National Police (PNP) iti Department of Social Welfare and Development (DSWD) ti naing-inget a koordinasyon kontra ti posible a siksikan kadagiti youth shelters gapo iti enhanced curfew.
Segun kenni PNP Chief Police Brigadier General Jose Melencio Nartatez Jr., panggep ti addang a masiguro a ti curfew ket para ti proteksyon dagiti agtutubo ken wsaan a makaapektar ti agraraira a sistema.
Impasiguro ti PNP a dagiti matiliwan nga aglabsing ti curfews ket makaawat ti umiso a pannakaaywan kadagiti youth shelters.
Maipalagip nga adda dagiti grupo a kumiddaw kenni Department of the Interior and Local Government Secretary Juanito Victor “Jonvic” Remulla nga adalen manen ti napalawa a curfew gapo iti posible a panagabuso ken panangarestar.
Inlawlawag pay ni Nartatez a ti addang ket para ti proteksyon dagiti agtutubo manipud kadagiti dakes nga ehemplo a kas ti sindikato, a saan a tapno laeng mangdusa.
