BR LA UNION – Sinsero a kimmiddaw ti dispensar ni Department of the Interior and Local Government (DILG) Secretary Juanito Victor “Jonvic” Remulla iti publiko partikular iti maysa a lalaki a naaresto a naka-ussob bayat nga agkiw-kiwar ti semento iti ruar ti balay da idiay Mandaluyong City.
Aminado ti sekretaryo a saan a nakaipaay ti nalawag a direktiba nu kasatno nga ipatungpal dagiti ordinansa iti sidong ti Safer Cities Initiative nga addaan tarigagay a pagtalnaen iti kalsada manipud kadagiti krimen.
Kinuna na a nakatuding a makitaripnong ken talantanen ti opisina na kadwa ti dadduma pay a law enforcement agencies ken dagiti lokal a gobyerno tapno maiyurnos dagiti konsiderasyon a kasapolan iti panangipatungpal dagiti polisiya.
Siniguro ti sekretaryo iti publiko, nga agtultuloy ti panangipatungpal daytoy laksid ti nasao a pasamak tapno saanen a maulit iti kapada nga insidente ken adalen da a naimbag dagiti panagbal-baliw ken konsiderasyon tapno mamantinir ti kinaurnos iti komunidad.
