BR LA UNION – Kinumpirma ti La Union Police Provincial Office (LUPPO) nga adda napasamak a riribok agarop alas tres ti parbangon idi Sabado, Abril 11, 2026 iti ruar ti Flotsam & Jetsam Bar idiay Barangay Urbiztondo, San Juan, La Union.
Maibasar iti imbestigasyon, dua a grupo dagiti indibiduwal a mapapati nga agpapada a nakainom ti arak iti nagkinnursunada, a nakaigapwan ti panagrarambol dagitoy.
Maibasar iti impormasyon manipud kadagiti otoridad, ti maysa a grupo ket naggapu idiay Cainta, Rizal, idinto a ti sabali a grupo ket lokal nga agnanaed ditoy La Union.
Iti inisyal nga imbestigasyon dagiti otoridad ken salaysay dagiti nakaimatang, nangrugi ti komosyon iti simple nga staredown wenno “pinnerreng” agingga a kimmaro a nagresulta iti nabara a panagsisinnungbat.
Segun kadagiti nagresponde nga otoridad, temporaryo a bimmaba ti tension idi ginandat ti grupo dagiti taga-Cainta a pumanaw.
Ngem timpuar ti sabali a komprontasyon iti ruar ti establisimiento agingga a napasamak ti kinnabil ken binnarsak ti bato.
Dagus a nagresponde dagiti operatiba ti Philippine National Police ket naiturong amin a karaman idiay San Juan police station para iti orientation ken kanayonan nga imbestigasyon.
Iti agdama, ur-urayen pay laeng dagiti pulis ti pormal a reklamo manipud kadagiti dua a grupo para iti pannakaipila ti kaso.
No maituloy ti pannakaipila ti reklamo, maidatag iti kaso a physical injuries ken slight physical injuries.
Mainaig ti daytoy, impalagip ni PLtCol. Lawrence Ganuelas, Public Information Officer ti La Union Police Provincial Office, iti publiko a liklikan ti agaramid ti riribuk ken agbalin a responsable iti panaginum iti arak, nangruna kadagiti lugar a masansan a pagturongan dagiti turista.
Kabayatanna, inbatad ni Provincial Director PCol. Redentor C. Ulsano kadagiti amin a hepe ti pulisiya ditoy probinsiya, a papigsaen ti police visibility partikular kadagiti destinasyon dagiti turista.
Karaman ditoy ti ad-adu a panagpatrolya ken koordinasyon kadagiti force multipliers tapno masigurado ti seguridad kadagiti natao a lugar.
