BR LA UNION – Pormal a kinumpirma ti testigo a ni Ramil Madriaga iti panagdengngeg idiay Kamara a nakaawat ti direktiba manipud kenni Vice President Sara Duterte para iti maysa a maipagarop a delivery idi Disyembre 2022, nga adda pakainaiganna iti kontrobersyal a panangusar ti P125 million a confidential funds.
Imbaga ni Madriaga a nai-deliver na ti milyones a pondo iti nakurang a 24 nga oras, saan ketdi nga 11 days kas naipadamag kadagiti immun-una a report.
Iti panagsalodsod ni Lanao del Sur 1st District Representative Zia Adiong, naipasidong iti clarificatory questions ti testigo a ni Mr. Ram Madriaga tapno lawlawagan dagiti detalye a nakapauneg iti insumite na nga affidavit ken supplemental affidavit.
Naisentro ti interogasyon iti maysa a reklamo seknan iti kuwestiyonable a panangusar ti pondo ti gobyerno.
Iti nasao a panagdengngeg, direkta a sinalodsod ni Rep. Adiong ni Madriaga nu pudno a nakailanad iti sinapataanna a salaysay a nakaawat ti tawag manipud Bise Presidente idi Disyembre 20, 2022 tapno mangipaay ti direktiba.
Simmungbat ti “OPO” iti testigo ken kinumpirma na iti eksakto a waragawag kenkuana ni VP Duterte.
Segun kenni Madriaga, nabayagen nga am-ammo na iti dak-dakamaten a ni Col. Nolasco, ken maysa pay nga opisyal a ni Col. Lachica.
Maipagarop a nakadwa na dagitoy iti panagisuro iti maysa nga specialized subject a mangdak-dakamat iti security safety.
Inaklon ti testigo iti komite a kalpasan ti nasao a tawag, nakaawat ti text message manipud kenni Col. Nolasco a mangibil-bilin ti panagturong na iti Central Office ti Department of Education (DepEd) para iti naurnos a transport.
Mamati ni Madriaga iti manipestasyon ti mammanday linteg a ti termino a transport ket kaibatugan iti sarita a delivery.
Kanayunan a konteksto, inlawlawag ni Madriaga iti komite dagiti simmaruno a napasamak.
Apaman a simmangpet iti opisina ti DepEd ket nakadwa na ni Col. Nolasco idi simmabat kadakuada ni Col. Lachica.
Segun kadagiti nakaimatang, adda kadwa a babae ni Lachica nga idi agangay ket naamwan babaen iti dokumento nga isuna ni Special Disbursing Officer Gina Acosta ti ahensya.
