BR LA UNION – Inallokoy ni House Deputy Speaker Paolo Ortega V ni Vice President Sara Duterte a dumar-ay iti impeachment hearing ita nga aldaw ti Miyerkoles, Abril 22 ken agsapata tapno direkta a sungbatanna dagiti alegasyon kontra kenkuana.
Segun kenni Ortega, napatpateg a mangngegan ti publiko iti testimonya iti sidong ti panagsapata ngem ti laksiden ti hearing ken mangiruar ti statement iti media tapno paglibakan dagiti pammabasol, partikular iti inbutaktak ti mapapati a “bagman” a ni Ramil Madriaga.
Sumangsango ni Duterte iti impeachment gapu iti mapapati a saan nga umiso a pannakausar ti P612.5 million a confidential funds iti Office of the Vice President ken Department of Education, kasta met ti isyu ti mapapati a kinabaknang a saan a maitunos iti naideklara nga statement of assets and liabilities wenno SALN na.
Kabayatanna, inpaganetget ni Ortega a no talaga a kayat ti Bise Presidente nga ilibak dagiti alegasyon ket rumbeng nga agparang iti komite, agsapata, ken sungbatanna dagiti saludsod iti opisyal a proseso.
Iti hearing ita nga aldaw, manamnama a pagsasaritaan ti House Committee on Justice dagiti financial records ni VP Duterte, pakairamanan ti SALN ken tax documents-na.
