BR LA UNION – Naipakita iti panagdengngeg ti House Committee on Justice dagiti Statement of Assets, Liabilities, and Net Worth (SALN) ni Vice Preisdent Sara Duterte ket rimwar nga awan ti indeklara na a petty cash wenno bank deposits manipud 2019 agingga 2024, iti laksid ti agtultuloy a panagngato ti net worth na.
Maibasar kadagiti dokumento a naipakita iti komite, adda pay napasamak a liquid assets ni Sara Duterte kadagiti naglabas a tawen kabilang iti minilyon a pisos a cash and deposits manipud 2007 agingga 2018 ngem kellaat a napukaw iti deklarasyon na sipud idi 2019.
Iti panagdengngeg, sinalodsod ni Manila Rep. Joel Chua ni Ombudsman lawyer Karen Batu nu posible nga awan uray singko a cash nga indeklara ti bise presidente manipud 2019 agingga 2024.
Kalpasan a kumpirmaren ni Atty. Batu nga awan ti indeklara a cash on hand wenno bank deposits ti bise presidente, napa-“Eh di WOW” lattan ti mammanday linteg.
Segun kadagiti mammanday linteg a pakaibilangan ni Bicol Saro Rep. Terry Ridon, maipagarop nga adda ti maaw-awagan a “P50 million gap” iti kita ni VP Sara sipud simrek iti gobyerno idi 2007.
Kinuna met ni Mamamayang Liberal Party-List Rep. Leila de Lima a makapadanag nu kellaat a napukaw ti liquid assets kadagiti simmaruno a SALN, ket posible a makaapekto daytoy iti kredibilidad dagiti financial disclosure ti bise presidente.
Maibasar iti datos, ti net worth ni Sara Duterte ket ngimmato manipud P7.2 milyon idi 2007 agingga P88.5 milyon idi 2024, a dimmalan iti sumagmamano a panagngato ken panagbaba iti naglabas a taw-tawen bayat nga adda isuna iti agsasabali a posisyon iti gobyerno.
Kabayatanna, saan a dagus a nangipaay ti waragawag iti kampo ni VP Duterte.
Segun iti tagapagsarita na a ni Atty. Michael Poa, awan pay ti maited da nga official statement.
