BR LA UNION – Inwaragawag ti Philippine Statistics Authority wenno PSA-Regional Statistical Services Office One iti resulta ti 2025 Economic Performance ti Ilocos Region babaen iti maysa a news conference a naangay ditoy siyudad ti San Fernando, La Union, idi kalman, Abril 23, 2026.
Naiparang babaen kenni Philippine Statistics Authority – Regional Director Atty. Sheila O. De Guzman, dagiti numero ken datos maipapan iti ekonomiya ti rehiyon.
Naipresinta ti panangdetermina iti economic performance ti maysa a rehiyon, a naibasar iti Gross Domestic Product ken Gross Regional Domestic Expenditure.
Segun iti ahensiya, dimmur-as ti ekonomiya iti Ilocos Region ti 4.5 percent idi 2025, nupay apagapaman a bimmaba nu ikumpara iti 4.9 percent idi 2024, maibilang latta daytoy a positibo nga indikasyon nga agtultuloy ti panagdur-as iti ekonomiya.
Kangrunaan a nakatulong iti economic growth ti rehiyon iti sektor ti serbisyo, a nakailista ti 55.0 percent.
Sumaruno iti sektor ti industriya a nakailista ti 30.3 percent,bayat nga iti agriculture, forestry, ken fishing ket nakailista ti 14.7 percent.
Kadagiti industriya, iti nakita a napaspas ti panagdur-as na ket iti human health and social work activities nga umabot ti 11.8 percent; iti public administration and defense, kabilang iti compulsory social security – 11.2 percent.
Adda met iti maikatlo a pwesto iti accommodation and food service sector a nakagun-od ti 9.9 percent.
Iti pakabuklan, nakaitulong ti Ilocos Region ti 0.1 percentage point wenno mangbuk-bukel daytoy ti 3.3 porsyento iti pakabuklan nga ekonomiya ti pagilian.
Dimmar-ay iti nasao a programa dagiti kameng ti Regional Statistics Committee, representatives maniud iti pribado a sektor, lokal a gobyerno, academe, media partners, kasta met dagiti opisyales ken empleyado ti PSA Central Office , Regional Statistical Services Office One ken dagiti Provincial Statistical Offices.
