BR LA UNION – Nangidatag ti reklamo ni Department of Energy (DOE) Secretary Sharon Garin kontra kenni Batangas Rep. Leandro Leviste, kas chairman ken presidente agraman dagiti board members ti Solar Para Sa Bayan Corp. (SPSB), idi Mayo 6 idiay Department of Justice.
Maak-akusaran dagitoy a napaay da a tungpalen ti obligasyon iti 25-year franchise a mangipaay ti kuryente kadagiti nasulinek a lugar.
Segun iti DOE, pito a tawenen ti napalabas sipud naikkan ti prangkisa idi 2019 ti nasao a kompaniya ngem maipagarop a saan a nausar wenno nakapag-operate a nasayaat, a panaglabsing iti Republic Act 11357.
Makunkuna a “knowingly and willfully neglected, failed, or omitted” iti kumpanya nga aramiden ti pagrebbengan da, maibasar iti reklamo a naidatag idiay DOJ.
Nakailanad pay iti dokumento a nakarkaru pay kadagiti nasao a tawen agsipudta nagtultuloy ti panangipaay ti renewable energy iti kumpaniya tapno kumita babaen ti sumagmamano a grupo dagiti kompaniya iti sidong ti Solar Philippines Power Project Holdings Inc., maysa a korporasyon a 100 porsyento a kukua ni Leviste.
Immuna a naipaayan ti 25 a tawen a non-eclusive franchise iti SPSB iti sidong ti liderato ni sigud a Presidente Rodrigo Duterte.
Kabayatanna, inawagan met a “super duper weak” ni Leviste iti reklamo ken imbaga na a naamwan na laeng daytoy iti media.
Ti kaso ket madama nga am-amirisen ti DOJ ken saan pay a pormal a naka-docket wenno naikabil iti listaan dagiti kaso a nakatuding a talantanen ti korte.
