Kinasuan ti Bureau of Internal Revenue (BIR) iti Lobelle Commodities Corporation idi kalman, Mayo 7, sadiay Department of Justice (DOJ) gapu iti biddut a panagusar ti value-added tax (VAT) exemption kadagiti inangkat daytoy a palm olein oil kabayatan ti maikatlo ken maikapat a kuarter ti 2020, a nagresulta ti ₱262 million a saan a nabayadan a buis.
Segun ti BIR, saan a kualipikado iti kompania iti VAT exemption gapu ta awan ti koneksion daytoy iti panagaramid ti animal feeds ken maipagarup a nailako iti produkto kadagiti saan a kualipikado nga entidad.
Inlawlawag ti BIR a ti VAT exemption ket mabalin laeng nga usaren no ti imported palm olein oil ket mausar iti produksion ti taraon ti ayup ken addaan ti sertipikasion manipud iti Food and Drug Administration (FDA) a saan a para iti human consumption.
Kabayatanna, nangipila met ti BIR iti kaso maibusor iti maysa a makinkukua ti meat stall ken maysa nga owner ti construction firm para iti nasurok a ₱8 million a saan pay nabayadan nga income tax ken VAT idi 2019.
Segun ti BIR, napakaammuan dagiti dua a respondents ken naikkan ti gundaway nga agbayad sakbay a naipila ti kaso.###
