Inwaragag ti National Bureau of Investigation nga imbestigaran da dagiti ‘vloggers’ a karaman iti panagkikil ti kwarta.
Segun kenni Bureau of Investigation Director Atty. Melvin Matibag, adalen ti ahensya nga uray dagiti indibidwal wenno ‘online content creators’ a mangar-aramid ti kapada nga aktibidad.
Daitoy ket gapo paylaeng iti pannakaarestar iti online media network personality a ni Franco Mabanta ken dadduma pay a kakadwa na iti kaso nga ‘extortion’.
Maibasar iti impormasyon ket mapapati a nagkikil dagiti nasao nga indibidwal kenni sigud nga House Speaker Martin Romualdez iti gatad a dumanon ti P300M.
Kasukat daitoy iti saan da a panangipablaak iti online media network ti ‘video expose’ a mangitudo iti mamanday-linteg ti isyu a korapsyon.
Nupay kasta, naballigi a naamwan ti ahensya ti plano ken naisayangkat ti ‘entrapment operation’ nu sadinno, ti mismo a Peanut Gallery Media Network founder a ni Mabanta iti naarestar.
Laksid na ket inlibak laeng ni Franco Mabanta ti alegasyon ken imbilang kas ‘set-up’ ti napasamak a pannakaarestar.
Impaganetget na nga inosente da kadagiti kakadwa na ken inyunay-unay a panagraut ti ‘freedom of the press’ ti pannakatiliw kadakuada dagiti operatiba.
Nainget met a pinaglibakan ti National Bureau of Investigation ti waragawag ni Mabanta ken kinuna a nagtignay da maibasar iti ebidensya.
Segun kenni Director Matibag nga awan iti pakainaigan na daitoy iti pulitika ken lalo a saan a tapno arestaren wenno unaen dagiti kritiko iti administrasyon ni Presidente Ferdinand ‘Bongbong’ Marcos Jr.
Agtaltalek ti National Bureau of Investigation a nasken nga agsungbat dagiti indibidwal a mangdaddadael iti reputasyon para laeng iti panagkolektar ti kwarta wenno maikkan ti posisyon.
