BR LA UNION – Nagballaag iti Partido Demokratiko Pilipino–Lakas ng Bayan (PDP Laban) kontra kadagiti mangsuporta iti impeachment case ni Vice President Sara Duterte a maipagarop nga i-blacklist ti partido.
Segun ti partido, saan da nga awaten dagiti mammanday linteg nga agbotos a pabor iti impeachment ti bise presidente.
Posible pay a mangiplastar da ti katapat a kandidato kontra kadakuada.
Impaganetget ti PDP Laban, saan a pangta daytoy ngem ketdi aw-awagan da a “political accountability” seknan iti maipagarop a politically driven impeachment kontra kenni Sara Duterte.
Kabayatanna, inwaragawag ni VP Sara iti interview idiay The Hague, Netherlands, a maysa isuna a “presumptive candidate” kalpasan nga indeklara na ti intensyon a tumaray iti sumaruno a presidential elections.
Agtultuloy met ti pannagna ti impeachment complaints kontra kenkuana iti House Committee on Justice kalpasan a maaprubaran iti Articles of Impeachment.
Kabilang dagiti akusasyon iti bise presidente ket ti maipagarop a biddut a panangusar ti P612.5 million confidential funds, panagpangta kontra kenni President Ferdinand Marcos Jr, First Lady Liza Araneta-Marcos, sigud nga House Speaker Martin Romualdez, ken maipagarop a saan a mailawlawag a kinabaknang.
Nakatuding a maidatag idiay plenaryo ti Kamara de Representantes iti impeachment report ita nga aldaw ti Lunes, tapno pagbobotosan dagiti house members, ket kasapolan ti 106 a botos tapno maipasa idiay Senado nga agserbi kas impeachment court.
