BR LA UNION – Inaprubaran ti Senado itay malem, Mayo 11, 2026 iti mosyon tapno ipasidong iti protective custody ni Senador Ronald dela Rosa bayat ti panang-sango iti maipagarop a kaso na iti International Criminal Court (ICC).
Ti nasao a mosyon ket indatag ti pada na a senador a ni Sen. Rodante Marcoleta, nga addaan tarigagay a protektaran ni dela Rosa bayat ti panangikagumaan ti amin a legal remedy maipapan iti kaso.
Segun kenni Marcoleta, maiparbeng a maprotektaran ni dela Rosa bayat a mailab-laban ti karbengan na.
Daytoy ti umuna a gundaway a dimmar-ay ni dela Rosa iti sesyon idiay Senado sipud naglangan idi Nobyembre 2025.
Maipalagip a saan a dimmar-ay kadagiti naglabas a sesyon gapu iti rimwar a report a maipagarop nga addan ti inyetnag a warrant of arrest ti ICC kontra kenkuana seknan iti kontrobersyal a war on drugs ti administrasyon ni sigud a Presidente Rodrigo Duterte.
Sakbay iti sesyon, imbaga ni dela Rosa a maipagarop a linapdan isuna ti sumagmamano a kameng ti National Bureau of Investigation (NBI) idi sumrek iti pasdek ti Senado.
Gaputi dayta, immandar ti Senado nga i-cite in contempt dagiti kameng ti NBI ken ipasidong iti kustodiya ti senado.
Kabayatanna, temporaryo a naipasidong iti lockdown iti Senado kalpasan ti maipagarop a panangarestar kenni dela Rosa bayat iti sesyon iti plenaryo.
Segun kadagiti kameng ti Senado, naipatungpal ti lockdown tapno madetermina dagiti kameng ti NBI a maiapagarop a nang-harass iti senador.
