BR LA UNION – Simmungbat ti Malacañang iti panawagan ni Sen. Ronald “Bato” Dela Rosa kenni Presidente Ferdinand Marcos Jr. a protektaran isuna seknan iti inyetnag nga arrest warrant ti International Criminal Court (ICC).
Segun kenni Palace Press Officer Undersecretary Claire Castro, amin a kumidkiddaw ti proteksyon manipud gobyerno ket maipaayan ti tulong a maiyannurot iti linteg, kabilang dagiti akusado kas ti senador.
Kinuna ni Castro, uray dagiti biktima ti extrajudicial killings (EJK) ket kumidkiddaw ti proteksyon manipud iti gobiyerno ken karbengan ti tunggal umili a maipaayan ti naan-anay a proteksyon ken due process iti sidong ti linteg.
Siniguro pay ti Palasyo nga ingkaso a maaresto ni Dela Rosa, maipaay kenkuana ti amin a karbengan kas maysa nga akusado.
Inlawlawag pay ni Castro, a saan a makibiang ni Presidente Marcos iti anyaman nga isyu nga adda iti hurisdiksyon ti Senado, agsipudta pagturayan daytoy ti Senado nga agdesisyon kadagiti banag a sakopen da.
