BR LA UNION – Impakaammo ti lokal a gobyerno iti segundo distito ti La Union iti iskedyul para iti agtultuloy a payout para kadagiti miyembro ti Tricycle Operators and Drivers Association (TODA) iti nagduduma nga ili iti maikadua a distrito.
Mangrugi ita nga aldaw, Mayo 13, ti innem nga aldaw a pannakaisayangkat ti payout agingga Mayo 20, 2026.
Paset pay laeng daytoy iti panangikagumaan ti gobyerno a tulongan dagiti drivers ken operators nga apektado iti garaw nangruna iti panagngato ti presyo dagiti produkto petrolyo.
Dagiti naituding a petsa ken lugar a pakaisayangkatan ti payout:
- Mayo 13: Pugo — Pugo Municipal Covered court
- Mayo 14: TUBAO — Tubao Civic Center
- Mayo 16: CABA — Diego Silang Plaza
- Mayo 18: BAUANG — Bagbag Covered court
- Mayo 19: AGOO — Agoo Civic Center
- Mayo 20: ROSARIO —Rosario Civic Center
Manamnama a babaen iti nasao a sistema ket masigurado iti “smooth transaction”
ken maliklikan ti adu a tattao nga agdopodop iti venue.
Nairanta pay daytoy a masiguro nga amin a kwalipikado a miyembro ket makaala ti ayuda a natalged ken napartak.
Maipalagip kadagiti amin a benepisiaryo nga urayenda ti opisyal a pakaammo manipud iti bukodda a Local Government Unit (LGU) para iti kanayunan a detalye, agraman dagiti dokumento a kasapulan nga itugot ken eksakto nga oras a panagawat.
Nabalakadan pay dagitoy a direkta a maki-koordinar iti masakopan a lokal a gobyerno wenno iti organisasyon tapno masigurado ti naannayas, napartak, ken natalged a proseso.
