BR LA UNION – Nangiruar ti pakdaar iti La Union Police Provincial Office mainaig iti viral video iti social media a pakakitaan ti maysa a grupo dagiti indibidual a mapapati a nakainum iti arak bayat ti panagsalada iti tengnga ti National Highway idiay Barangay Urbiztondo, San Juan, La Union.
Iti nasao a video, makita ti grupo a nangsakup iti paset ti kalsada a nakaigapuan ti pannakasinga ti naannayas a taray ti trapiko, nupay awan ti napasamak nga aksidente ngem mangigubway daytoy ti peggad iti kinatalged dagiti motorista, commuters, ken dadduma pay nga agus-usar iti kalsada.
Segun iti La Union Police, nalawag a panaglabsing daytoy iti road safety regulations ken pannakasinga iti naannayas a taray ti trapiko iti kangrunaan a kalsada.
Segun kenni PMAJ Arcellie O. Pang-ag, baro a Public Information Officer iti LUPPO, ti panagparnuay ti riribuk ken eksena ket maysa a kita ti kinaawan panagraem, nangruna iti lugar a napeggad a mabalin a pakaigapuan ti aksidente.
Balakad na kadagiti turista ken bisita nga agtur-turong ditoy La Union ken iti sadinuman a lugar a pagturongan nga agbalin a disiplinado ken responsable a turista.
