Dinepensaan ni Davao 1st District Representative Paolo Duterte dagiti reklamo nga impila ni Act Teachers Party-list Representative Antonio Tinio sadiay Ombudsman.
Nairanta iti reklamo nga imbestigaran dagiti mapapati nga iregularidad dagiti 121 a flood control projects idiay Davao Citynga aggatad ti P4.4-B manipud tawen 2019 agingga 2022.
Iti waragawag na ket binabalaw ni Representative Duterte nu apay a saan pay nga impaimbestigar ni Representative Tinio dagiti inhinyero, contractors, ken dadduma pay a politiko a karaman ti maanomalya a proyekto.
Pinalagipan na pay ni Tinio a saan a lipaten ti pudno a mandato ti ACT Teachers Party-list, a nakapamaysa iti panangitandudo ti nangatngato a kaledad ti edukasyon.
Kunana ket kastoy iti mapasamak nu ti maysa a party-list representative ket maliplipatanen ti pudno da a mandato.
Ti ACT Teachers ket nabukel para kadagiti pakaseknan dagiti mannursuro, classrooms, sueldo, ken masakbayan dagiti estudyante a Pilipino.
