BR LA UNION – Impaganetget ni Sen. Win Gatchalian a kasapolan ti nalawa a panangurnos iti Senado, nangruna ti imahe daytoy, kasaruno ti serye ti riribok a napasamak iti nangato a pagpandayan linteg iti naglabas a lawas.
Dinakamat ti senador dagiti rumrumwar ita a video iti internet, a ti topiko ket agsisimparat a pammabalaw ken pagkatatawaan a pasamak idiay senado.
Kinuna na a rumbeng a baliwan daytoy ken matutukan iti agdama a liderato wenno siasinuman a sumaruno a lider ti Senado.
Segun kenni Gatchalian, iti uneg ti 10 a tawen na kas senador ket ita laeng a nakapadas ti nasao a sitwasyon.
Aminado ti senador a naapektaran iti dignidad ken imahe ti Senado, kasaruno dagiti serye ti riribok, nangruna ti napasamak a pammaltog iti uneg.
Iti agdama, aglaw-lawagen kunana iti napasamak a pammaltog, ken rumbeng a mairuar ti actual a napasamak idiay senado, ken mapagsungbat iti siasinuman a karaman ditoy.
Kinuna na a rumbeng a masiguro a saanen a mapasamak daytoy iti masangwanan, kas proteksiyon iti imahe ken integridad ti senado.
Maipalagip a rimwar ti nagan ni Gatchalian kas maysa kadagiti pagpilpilyan nga agbalin a presidente ti Senado, gaputa adda kabaelan na a pagkaykaysaen iti sumagmamano a miyembro ti majority bloc ken uray ti agdama a minority bloc.
Nangipeksa met ti interest ken kumpiyansa ti dadduma pay a senador iti kabaelan ni Gatchalian a mangidaulo iti Senado.
