Karaman kadagiti posible a maipasango a testigo ti House prosecution panel iti impeachment trial ti Senado kenni Bise Presidente Sara Duterte ket dagiti opisyales manipud Anti-Money Laundering Council (AMLC), Office of the Ombudsman, Securities and Exchange Commission (SEC), ken National Bureau of Investigation (NBI).
Segun kenni House Prosecutor ken Bicol Saro Party-list Representative Terry Ridon, napateg dagiti testimonya da mainaig kadagiti alegasyon ti saan a mailawlawag a baknang ken posible a panaglabsing kadagiti allagaden maipapan ti Statement of Assets, Liabilities and Net Worth (SALN).
Maad-adal metten nu mairaman kadagiti testigo dagiti opisyales manipud Bureau of Internal Revenue (BIR) para ti tax records ni VP Sara ken ti asawa na a ni Atty. Mans Carpio.
Malaksid kadagiti volunteer lawyers, mangala pay ti prosecution panel kadagiti financial experts, accountants, ken auditors tapno tingitingen ti AMLC records ken dagiti SALNs nu kasta ket mapapigsa ti ebidensya iti panagusig.
