BR LA UNION – Nangipatungpal ti nairut a security measures iti Senado kagiddan ti naituding a deadline ita nga aldaw, Hunyo uno, tapno agsumite ni Vice President Sara Duterte ti sungbat na iti Articles of Impeachment.
Maibasar iti abiso, agingga laeng iti oras ti alas-7 inton rabii (Hunyo 1, 2026) a mabalin nga agsumite ti sungbat iti Bise Presidente, personal man, babaen iti abogado, wenno electronic mail.
Maipalagip a pormal a naipatulod kenni VP Duterte iti summons idi Mayo 20, dua nga aldaw kalpasan a nag-convene ti Senado kas impeachment court.
Namnamaen a mangrugi ti impeachment trial inton Hulyo 6, 2026.
Sumangsango ni Duterte iti reklamo a culpable violation of the Constitution, graft and corruption, ken betrayal of public trust.
Gapu iti manamnama a panagdopodop ti media, supporters ken kritiko ti Bise Presidente, nangiplastar ti Office of the Senate Secretary iti allagaden para iti coverage ti media ken nangituding pay iti lugar a mabalin a pangisayangkatan ti press briefing iti kampo ni Duterte.
Segun iti Senado, nairanta ti addang a masiguro a naurnos ken natalged iti proseso a panangidatag ti sungbat ti bise presidente idinto a maipaayan ti naan-anay nga access ti media iti napapateg a pasamak.
Nakikoordinar ti National Capital Region Police Office (NCRPO) iti Office of the Sergeant-at-Arms tapno masiguro nga agbalin a naannayas iti aglawlaw ti Senado.
Sumagmamano itan a lawas a naideploy dagiti pulis iti ruar ti pasdek gapu kadagiti tignay-protesta ti naduma-duma a grupo nga addaan nagduduma a takder iti impeachment case ni Duterte ken dadduma pay nga isyu a sangsangwen ti Senado.
Kabayatanna, iti sidoig ti Rules of Procedure on Impeachment Trial, maipaayan ti lima nga aldaw iti prosecution panel tapno agsumite ti reply apaman a maawat na iti sungbat ti Bise Presidente.
