BR LA UNION – Kinontra ni Senador Panfilo “Ping” Lacson iti imbaga ni sigud a Senate President Alan Peter Cayetano a panangbirngas kenkuana kas “aso” ti Malacañang.
Iti maysa a waragawag iti X (sigud a Twitter), imbaga ni Lacson a kaatnuman ket saanna nga aklonen ti nasao nga akusasyon ni Cayetano.
Dinillaw na pay iti nabayagen nga awag kenkuana ni Cayetano a “Kuya Ping,” isunga nu aso ti pangibil-bilanganna kenkuana, ket arigna maysa a “self-admission” daytoy wenno panangaklon iti bagi ni Cayetano.
Segun pay kenni Lacson, maasyan isuna iti sitwasyon ni Cayetano agsipudta kumporme lattan ti ibagbaga na.
Nangipeksa ti panagdanag ti senador ket imbaga na a saan koma a naan-anay nga ag-meltdown weno bumigay ti padana a senador.
Inaramid ni Lacson iti waragawag kalpasan nga imbaga ken binirngasan isuna ni Cayetano iti Facebook Live broadcast nga “aso”.
Inlawlawag ni Cayetano a ti kaipapanan ti “aso” ket maysa nga indibidwal a pas-pasurot wenno sumur-surot kadagiti bilin.
Malaksid kenni Lacson, direkta pay nga inawagan ni Cayetano da Senate President Pro Tempore Vicente Sotto III ken Sen. Raffy Tulfo a “tuta” ti Malacañang bayat a ni Sen. Erwin Tulfo ket maipagarop a “tuta” ni Lacson .
