BR LA UNION – Posible a makaapekto iti suplay ti danum idiay Metro Manila ti agtultuloy a panagbaba ti lebel ti danum iti Angat Dam idiay Bulacan.
Segun iti Philippine Atmospheric, Geophysical and Astronomical Services Administration (PAGASA), kurang ti nailista a tudo ditoy pagilian ita a bulan ti Hunyo.
Agingga ti Hunyo 20, aganay 120 millimeters pay laeng iti nailista a tudo wenno kagudwa laeng ti kaadu koma a tudo para iti pakabuklan a bulan.
Kinuna ti PAGASA a nairut da a banbantayan iti water level ti Angat Dam.
Nu bumaba daytoy iti 160 meters, mabalin a tumaod ti panagkurang ti suplay ti danum.
Kabayatanna, immunan a nagdeklara ti state of calamity iti ili ti Puerto Galera idiay Oriental Mindoro gaputi nakaru a panagkurang ti danum a sumagmamano itan a bulan a problema dagiti residente sadiay.
Sangapulo ket maysa manipud iti 13 a barangay ti nasao nga ili iti apektado ti krisis iti danum bayat nga adda ti sumagmamano a lugar nga awanen ti suplay ti danum.
Segun iti local a gobyerno, maysa a makagapo ket ti epekto ti El Niño ken panagadu iti konsyumer ti danum.
Tapno maliklikan ti kapada a sitwasyon idiay Metro Manila, mangisay-sayangkat ti nagduduma nga addang iti National Water Resources Board.
Kabilang ditoy iti panagsapol ti kanayunan a pagalaan ti danum kas iti deep well, Laguna de Bay, ken sumagmamano a water treatment facilities idiay Parañaque ken Cavite.
