Pinapigsa ti Lokal a Gobierno ti Bacnotan iti pakaammo dagiti livelihood groups maipanggep iti financial management ken negosio babaen ti Financial Literacy and Basic Bookkeeping Training nga insayangkat ti Department of Labor and Employment (DOLE) La Union Field Office iti panagkaykaysa da iti Public Employment Service Office (PESO) Bacnotan idi kalman, Hunio 23, 2026, iti Bacnotan Farmers’ Agri-Tourism Center.
Panggep ti aktibidad a mangited ti ad-adu a pannakaammo ken kinasirib kadagiti benepisiario dagiti programa a pangkabuhayan tapno mapapigsa pay iti panangimaton da iti kuarta ken pannakapadur-as dagiti bukodda a pagbiagan.
Nakipaset met ni Mayor Divine Fontanilla iti aktibidad tapno ipakita iti suporta ti lokal a gobierno kadagiti programa a mangipaay ti adal ken oportunidad kadagiti umili.
Segun iti alkalde, napateg iti agtultuloy a panagsanay ken pannakaipaay ti technical assistance tapno mapagtalinaed a natibker ken naballigi dagiti pagbiagan a pakairamanan dagiti Bacnotanean.
Indauloan ni DOLE La Union Field Office Officer-in-Charge Bernadette Manitag iti panagsanay a tinabunoan dagiti mushroom growers, tobacco farmers, meat processing beneficiaries, buffalo raisers, bakers, ken dadduma pay a kameng dagiti livelihood associations iti ili.
Naibinglay iti panagsanay dagiti adal maipanggep iti financial management, basic bookkeeping, leadership development, ken project management tapno mapapigsa pay iti kabaelan dagiti partisipante iti nasayaat a panangidalan ken panangipadur-as kadagiti negosio wenno pagbiaganda.
Kabayatanna, agtultuloy iti panagkaykaysa ti Lokal a Gobierno ti Bacnotan iti panangidadaulo da Mayor Divine Fontanilla ken Vice Mayor Francis Fontanilla kadagiti naduma-duma nga ahensia ti gobierno tapno maisangsangayan dagiti programa a mangpataud iti ad-adu nga oportunidad iti pangkabuhayan ken panagdur-as para kadagiti amin a Bacnotanean. (Bombo Jordan Colcol)
