BR LA UNION – Kinumpirma ti Department of Foreign Affairs (DFA) nga awan iti Pilipino a nasaktan iti napasamak a panagbettak ti Ras Laffan gas facility idiay Qatar.
Dayta ti siniguro ni DFA spokesperson Aianlyn Ratonel, kalpasan a makumpirma ti Philippine Ambassador idiay Qatar nga ‘awan ti Pilipino a nairaman iti insidente.
Naamwan a napasamak idi Domingo iti maysa nga “operational incident” idiay Ras Laffan, a pakasarakan iti kangrunaan a liquefied natural gas processing operations ti nasao a pagilian, a nagresulta iti panagbettak ken uram idiay Barzan gas plant.
Segun iti kumpanya a dagus met laeng a nasebseban iti uram, ngem saan pay a nalawag nu kasatnu kalawa ti perdisyon iti planta nga agsup-supply ti gas para iti domestic market.
Kumpirmado a natay iti 13 a tatttao kalpasan ti napigsa a panagbettak iti maysa a pasilidad ti liquefied natural gas (LNG) a Ras Laffan industrial zone idiay Doha, Qatar.
Segun kenni Qatari Energy Minister Saad Sherida al-Kaabi, manipud India ken Pakistan dagiti biktima ti panagbettak.
Nangidanon met ti pannakipagrikna iti Embahada ti India idiay Doha kadagati naulila a pamilya dagiti natay ken impasigurado na a maipaay ti amin a kasapolan a tulong kadakuada kasta met kadagiti nadangran.
Iti agdama, agtultuloy ti imbestigasyon iti nakaigapwan ti panagbettak, nupay immunan a naipadamag a nakapasar ti “technical accident” iti Barzan local gas supply facility bayat a mangrugrugi pay laeng iti operasyon daytoy, kalpasan a naisardeng idi Marso gaputi nalawa a pannakadadael a gapuanan ti gubat idiay Middle East.
