Pinasingkedan ti pannakangiwat ti Iglesia ni Cristo (INC) a ni Bro. Edwil Zabala nga iti rally a naangay idiay EDSA ket kas pangsuporta kenni Senador Rodante Marcoleta.
Napasamak daytoy kalpasan nga inwaragawag ni Ombudsman Boying Remulla a makasuan ni Marcoleta ti plunder, a maysa a non-bailable case.
Segun kenni Zabala, saan a kontra ti INC iti pannakaipatungpal ti linteg ngem kontrada iti pannakaballikug daytoy, nangruna no iti panggep ket ti panangakkob iti korapsion.
Impaganetgetna nga indauluan ni Senador Marcoleta iti imbestigasion ti maysa kadagiti kadakkelan a panagtakaw iti pakasaritaan ti pagilian.
Innayon pay ti INC nga uray no maibalud ni Marcoleta, saanda nga isardeng iti panagpanawagan ti hustisia, kinalawag, ken panagsungbat.
Nagpanawagan da para iti transparency, accountability, justice, ken peace, ken inpaganetget nga iti selective justice ket maysa a klase ti injustice.
Idi kalman, inwaragawag ni Ombudsman Remulla nga ita a lawas ket maipila iti Sandiganbayan ti non-bailable case kontra kenni Marcoleta mainaig iti campaign donations nga aggatad ti ₱75 million.
Malaksid kadagitoy, maipagarup a sumagmamano a grupo ti nakipaset iti kellaat a rally.###
