Nadangran iti dua a Grade 11 students kalpasan a bagsulan iti kaklase da iti uneg ti silid-pagadalan ti Cabaluay National High School idiay Barangay Cabaluay, Huwebes ti bigat, Hulyo 2.
Maibasar iti inisyal nga imbestigasyon, maipagarop a binugbog ti dua a biktima iti suspek sakbay a bimmunot daytoy iti bassit a kutsilyo a nakabalkot iti papel ken imbagsol na kadagiti dua.
Dagus a naiturong iti ospital dagiti biktima, bayat a ti suspek ket naipasidong iti guidance counselor ti pagadalan.
Segun iti pulisya ken dagiti opisyal ti barangay, maipagarop a nabayagen a makapadpadas ti bullying ken peer pressure iti suspek manipud kadagiti dua nga estudyante.
Rimuar iti imbestigasyon a pilpilitan da isuna a mangusar ti marijuana.
Agtultuloy iti imbestigasyon dagiti otoridad iti maipagarop a pannakairaman ti ilegal a droga ken nu kasatnu a naiserrek ti kutsilyo ti uneg ti pagadalan.
Kabayatanna, impasigurado ti Department of Education (DepEd) a mangipaay da ti suporta kadagiti apektado nga estudyante ken makibinnulig da iti eskwelaan bayat iti panagtultuloy ti imbestigasyon.
Innallukoy met dagiti otoridad iti publiko a saan a mangiwaras dagiti saan a beripikado nga impormasion.
