BR LA UNION – Natakwatan dagiti managsukisok iti uppat a baro a fault zones iti sirok ti baybay iti laud a paset ti Luzon.
Ti nasao a panagadal ket indaulwan dagiti eksperto manipud UP Marine Science Institute (UP MSI), kadwa da ti DOST-PHIVOLCS ken UP-National Institute of Geological Sciences (UP-NIGS).
Dagiti baro a nadetermina a fault zones ket agserserbi a “branches” a rumwar manipud kadagiti kangrunaan a Philippine Fault Zone.
Maysa kadagiti nasao a baro a branches ket umat-atiddog nga umabot agingga iti Manila Trench.
Daytoy ket maysa nga aktibo nga undersea trench a mabalin a pagtaudan ti napipigsa a gingined ken tsunami.
Gaputi nasao a fault zone, nakita da a daytoy ti manggudwa iti Manila Trench iti dua a nagsina a paset.
Nabukel ti baro a ring-ngat gaputi nakaru a puwersa wenno pannaka-ipit ti Pilipinas iti baetan ti dua a dadakkel a tip-ping ti daga wenno tectonic features.
Maidur-duron ti pagilian babaen ti Palawan Microcontinental Block manipud abagatan-a-laud, bayat nga idur-duron met daytoy ti Philippine Rise wenno sigud a Benham Rise manipud amianan-a-daya.
Ti kaadda ti mapa dagiti baro a fault ket dakkel a tulong tapno nalak-laka a maamwan dagiti siyentipiko nu sadino iti posible a pakariknaan dagiti napipigsa a gingined.
Makatulong ti nasao a panagadal iti panagaramid ti umno nga “hazard assessments” tapno mapasayaat ti panagsagana ti gobyerno ken umili kontra iti pangta ti gingined ken tsunami iti Luzon.
