BR LA UNION – Nangisayangkat iti pre-disaster risk assessment ti Provincial Disaster Risk Reduction and Management Office (PDRRMO) nga idauluan ni Governor Mario Ortega kabinnulig dagiti nadumaduma nga opisina ti Provincial Government ken dagiti kakadua nga ahensiya ti gobierno, kas panagsagana iti posible nga epekto ti Super Typhoon Inday.
Iti interview kenni Alvin C. Cruz, OIC-Provincial Disaster Risk Reduction and Management Officer (PDRRMO), kinunana a naka-high alert dagiti personnel da ken nakasagana amin a kasapulan nga alikamen para iti dagus a panagresponde iti aniaman nga insidente a mabalin a gapuanan ti habagat ken ti bagyo.
Segun kenni Cruz, nainget ti panangmonitor ti PDRRMO kadagiti high-risk areas, pakairamanan dagiti flood-prone ken landslide-prone areas iti umuna ken maikadua a distrito ti La Union tapno masigurado ti kinatalged dagiti umili.
Innayonna nga agtultuloy ti pannakikoordinar ti PDRRMO kadagiti amin a Local Government Units (LGUs) ditoy probinsia.
Naisayangkat pay ti risk assessment tapno maiwanwan ken matulongan ti tunggal munisipyo iti kasapulan ken panagsagana da kadagiti posible a didigra.
Agtalinaed met a nakasagana dagiti evacuation centers iti nadumaduma nga ili ditoy La Union. Adda bukod a stockpiles dagiti LGU a relief supplies, idinto a nangipaay pay ti Gobierno Probinsial iti sidong ni Gobernador Mario Ortega iti kanayunan a relief goods para kadagiti lokal a gobierno tapno masigurado ti dagus a responde no adda emerhensiya.
Kabayatanna, impalagip ni Cruz iti publiko nga agtalinaed a nasiput, regular a bantayan dagiti opisyal a balakad manipud kadagiti maseknan nga ahensiya, agsagana para iti posible a panagbakwit, ken makitinnulong kadagiti otoridad no panawen ti didigra.
