BR LA UNION – Agtalinaed a naka-alerto dagiti barangay ditoy siudad ti San Fernando, adda man wenno awan ti epekto ti Typhoon Inday ditoy probinsiya ti La Union.
Sipud simrek iti teritoryo ti Pilipinas ti nasao a dakes a panawen agingga ita a gundaway ket awan pay ti epekto na daytoy iti probinsiya.
Nupay kasta, kinuna ni Barangay Kapitan Juanito Literato ti Barangay Pagudpud, nga agtaltalinaed a naka-alerto da ken agtultuloy ti panangmonitorda iti panawen tapno masigurado ti kinatalged dagiti kabaranggayan da.
Imbinsa-binsa ni Kapitan Literato dagiti inaramidda nga addang kas panagsagana iti posible nga epekto ti bagyo.
Karaman kadagiti inaramidda a preemptive measures ket panagputed iti sanga ti kayo a mabalin a paka-apektaran dagiti linya ti koriente, panangdalus iti drainage system tapno malapdan ti layus, ken panang-simpa dagiti street lights tapno masiguro nga adda latta silaw no tiyempo ti emerhensiya.
Kinuna na a rinugyan da idi rabii ti 24/7 monitoring operations ti barangay iti pannakitinnulong dagiti opisyal ti barangay ken volunteer responders, para iti aniaman nga insidente a mabalin a pataden ti bagyo.
Kinunana a nakasagana metten ti taraon, pakairamanan ti hot meals nga inted ti Gobierno Siudad ti San Fernando para kadagiti posible nga evacuees ken personnel nga agduty kabayatan ti kalamidad.
Insagana da pay dagiti rescue equipment, emergency response tools, life vest, flashlight, ken dadduma pay nga alikamen a mabalin nga usaren no adda layus, evacuation, wenno dadduma pay nga emerhensiya.
Impalagipna pay iti publiko a siguraduen a natibker ti pagtaenganda, mangisagana kadagiti emergency go bag, ken dadduma pay a kangrunaan a kasapulan bayat nga agtultuloy ti panangmonitor dagiti otoridad iti panaggaraw ti Bagyo Inday.
