BR LA UNION – Maipagarop nga awan pay ti nakita a kumpirmado nga impormasyon iti National Bureau of Investigation (NBI) seknan iti pakabigbigan ti makunkuna a “hitman” a maipagarop a kinontrata ni Vice President Sara Duterte tapno dangran da President Ferdinand Marcos Jr., First Lady Liza Araneta-Marcos, ken sigud nga House Speaker Martin Romualdez.
Segun kenni Atty. Jeremy Lotoc, Regional Director ti NBI-Bangsamoro Autonomous Region in Muslim Mindanao (BARMM), pinadas da a duktalen iti pakabigbigan ti maipagarop a kinontrata ti bise presidente a tao babaen iti panangala ti impormasyon manipud kadagiti tattao nga adda pakainaiganna iti online press conference idi imbaga ti Bise Presidente iti kontrobersyal a waragawag.
Nupay kasta, imbaga ni Lotoc nga awan ti naala da nga umdas ken beripikado nga impormasyon tapno madetermina nu siasino iti makunkuna a “hitman.”
Impaganetget pay ni Atty. Jeremy Lotoc a maibasar iti panagsukimat ti NBI, maipagarop nga addaan ti indikasyon a nangkontrata ni Vice President Sara Duterte ti tao tapnu ipapatay da Presidente Ferdinand Marcos Jr., First Lady Liza Araneta Marcos, ken sigud nga House Speaker Martin Romualdez sakbay pay ti inaramid a press conference idi Nobyembre 2025.
Kabayatanna, pinaglibakan ti defense team ni Sara Duterte iti alegasyon nga adda kinontrata a tao tapno mangisayangkat ti nasao a plano.
Segun iti abogado ti depensa a ni Atty. Mark Vinluan, mangidatag da iti ebidensiya tapno paneknekan ti posisyon da.
Imbaga pay ti depensa a mangidatag da ti testigo seknan iti maipagarop nga “Operation Romanov” a makunkuna a plano kontra kenni Vice President Duterte ken pamilya na.
