BR LA UNION – Impadamag ti Philippine Atmospheric, Geophysical and Astronomical Services Administration (PAGASA) a dua agingga uppat a bagyo iti mabalin a mabukel wenno sumrek iti Philippine Area of Responsibility (PAR) inton Agosto.
Maibasar iti Climate Outlook nga inruar ti state weather bureau, mapattapatta a dua agingga iti tallo a bagyo ti mapasaran inton Setyembre, maysa agingga iti dua inton Oktubre, Nobyembre, ken Disyembre, idinto nga awan agingga iti maysa a bagyo inton Enero 2027.
Kinuna pay ti PAGASA a posible a mabukel iti maysa a napigsa nga El Niño iti nagbaetan ti Oktubre 2026 ken Enero 2027.
Nupay mabalinna a kissayan ti bilang dagiti bagyo, agtalinaed ti posibilidad a mabalin a pumigsa ti sumagmamano a mabukel a dakes a panawen nga agbalin a naan-anay a super typhoon.
Segun pay iti weather bureau, manamnama ti dandani normal a kaadu ti tudo iti dakkel a paset ti pagilian inton Agosto, nupay mabalin a mapasaran ti ad-adu a panagtudo iti sumagmamano a paset ti Western Luzon.
Kabayatanna, basbassit met ti namnamaen a panagtudo iti dadduma a lugar iti Southern Luzon, Visayas, ken Mindanao.
Nagballaag ti PAGASA a mabalin a mapasaran ti dry spell ti dadduma a lugar iti Eastern Visayas ken Mindanao inton agtapos ti bulan ti Agosto, idinto a posible ti kasasaad ti tikag idiay Camarines Norte, Catanduanes, Biliran, Cebu, Negros Oriental, Northern Samar, Samar, ken Siquijor.
