BR LA UNION – Nangidatag ti ethics complaint ti maysa a grupo ti women’s rights advocates, academics, ken feminists kontra kenni Senator-Judge Pia Cayetano gapu iti maipagarop a panangibinglayna iti spliced wenno edited video bayat ti panagserbina kas senator-judge iti impeachment trial ni Bise Presidente Sara Duterte.
Kiniddaw dagiti nagreklamo kenni Senate Committee on Ethics and Privileges Chairperson Senator Vicente “Tito” Sotto III nga imbestigaran ni Cayetano mainaig iti nadakamat a social media post.
Segun iti grupo, ti shared video ket nangpataud iti biddut nga impresyon nga inaklon ni House prosecutor ken Akbayan Rep. Chel Diokno nga inlungalong na ti impeachment case kontra kenni Duterte, nupay maipagarop nga awanan ti ebidensiya.
Impaganetget ti koalisyon a kas senator-judge, namnamaen nga agtalinaed a patas ken awan panangidumduma ni Cayetano, ken nasken a liklikan ti anyaman nga aramid a mabalin a mangpataud iti panagduadua iti panagbalin nga impartial iti impeachment proceedings.
Pattien pay dagiti nagreklamo a ti maipagarop a pannakaiwaras ti biddut nga impormasyon ket mabalin a mangdadael iti integridad ti impeachment trial ken panagtalek ti publiko iti Senado nga agtigtignay kas impeachment court.
Immunan nga inlawlawag ni Diokno iti konteksto ti waragawagna, a segun kenkuana, iti dak-dakamatenna a “fishing expedition” ket mapasamak laeng no ti maysa a partido ket agsapsapul ti ebidensiya nga awan ti umdas a basaran.
Kabayatanna, kiniddaw ti Bombo Radyo iti palawag ni Sen. Pia seknan iti isyu ngem awan pay ti sungbat na.
