BR LA UNION – Tinakderan ti maysa nga state auditor nga adda iregularidad iti panangusar ti Office of the Vice President (OVP) iti P375 million confidential funds idi 2023.
Iti maika-15 nga aldaw ti impeachment trial ni Vice President Sara Duterte idi kalman, Miyerkules, imbaga ni Commission on Audit (COA) Intelligence and Confidential Funds Audit Office auditor Xylene del Campo a kurang dagiti dokumento nga insumite ti OVP tapno paneknekan ti pananggastos ti confidential funds.
Kabilang ditoy iti bayad dagiti reward, a segun kenni Del Campo ket awan ti naan-anay a dokumento a mangpaneknek iti nagbalin a resulta ti information gathering wenno surveillance a basaran ti panagbayad.
Maipagarop nga awan pay tinaipaay kadakuada a kanayunan a dokumento tapno maamwan ken paneknekan iti sumagmamano a ginatang a supplies, medical ken food aid.
Maipagarop pay nga adda nakita nga iregularidad ti COA iti reimbursement dagiti ginastos, kabilang iti surveillance expenses.
Segun kenni Del Campo, saan a mabalin nga usaren ti confidential funds para iti reimbursement gaputa mailabsing daytoy iti Joint Circular No. 2015-01, a mangitud-tuding kadagiti allagaden iti panangusar ti confidential ken intelligence funds.
Kinna pay ti auditor a saan a sakop ti mandato ti OVP ken Department of Education (DepEd) iti panangisayangkat ti confidential operations.
Kabayatanna, saan a nakaited ti sigurado a sungbat ni Del Campo nu pudno wenno imahinasyon laeng dagiti nagan ti sumagmamano a recipient ti confidential funds nga imbaga ti depensa kas “funny names.”
Iti panagsalodsod ti defense counsel a ni Atty. Kristine Ferrer nu kaipapanan kadi a saan a peke dagiti nasao a nagan, imbaga ni Del Campo a saan na a masungbatan ti salodsod.
Kinuwestiyon pay ti depensa iti panagsumite ti COA ti audit documents seknan iti confidential funds iti House panel a nangisayangkat ti imbestigasyon iti panagusar ti pondo ti OVP ken DepEd.
Inlawlawag ni Del Campo nga insumite ti COA dagiti dokumento kas panagtulnog iti bilin ti House panel.
