Nakasagana a sumurot iti defense team ni Vice President Sara Duterte iti aniaman a panagbalbaliw iti iskedyul ti impeachment trial nga ituding ti Senado, segun kenni Atty. Michael Poa, lead spokesperson ken defense counsel ni Duterte.
Inkiddaw ti House prosecution team nga iyakar ti alas-3 ti malem iti panagusig, ken mabalin a posible dagiti panagdengngeg kada aldaw ti Biyernes, tapnu mapapartak iti proseso.
Kinuna ni Senate President Sherwin Gatchalian, napagnunumuan dagiti senator-judge nga iyakar iti oras ti trial.
Iti agdama, kadawyan a mangrugrugi ti alas-10 ti bigat ti trial ken agleppas sakbay ti plenary session ti Senado alas-3 ti malem.
Nu awanen ti kanayonan a pannakatantan, nakaituding iti maika-17 nga aldaw ti panagusing inton Lunes, Agosto 24.
Orihinal a naituding iti trial iti uneg ti 92 nga aldaw—62 nga aldaw para iti prosecution ken 30 aldaw para iti defense.
Sumagmamano a panagdengngeg ti nakanselar gapu iti dakes a paniempo ken panaglayus nga ingubuay dagiti bagyo ken Habagat.
