Kitkitaen pay ti House prosecution panel nu iparang da kas testigo si Ramil Madriaga iti impeachment trial ni Vice President Sara Duterte.
Segun kenni House prosecutor Terry Ridon, nakaituding pay laeng nga agaramid ti pinal a desisyon iti panel mainaig iti panagtestigo ni Madriaga, a mamin-anu metten a kwinuwestyon ti depensa iti kredibilidad daitoy.
Maipalagip a nangipila ti maikadua a reklamo a perjury iti kampo ti bise presidente kontra kenni Madriaga, a mangpapabasol kenkuana panggep kadagiti false statements iti supplemental affidavit na.
Naipalgak iti nasao nga isyu kalpasan nga iladawan ni Atty. Paolo Panelo iti posible a panagsango ni Madriaga iti panaglitis kas “funeral” ti prosekusyon, ken kinuna a lamunin laeng isuna ti defense iti cross-examination.
Kinuwestyon met ni Ridon iti panagkomento ni Panelo iti witness strategy ti prosekusyon, agsipudta saan met daitoy a miyembro ti depensa.
Innayon pay ti House prosecutor a maibilbilang ni Madriaga kas common witness, isu nga awan iti panakakissay daitoy ti sabali a dasig.
