BR LA UNION – Umaboten iti 32 a tattao ti kumpirmado a natay gapu iti nagtipon nga epekto ti Habagat ken dagiti naglabas a bagyo Luis, Maymay, ken Neneng, maibasar iti kauddian a datus ti Office of Civil Defense (OCD).
Iti probinsiya ti Benguet ti nakailista iti kaadwan a biktima agsipudta 15 a tattao ti natay gapwanan iti landslide.
Nakailista met ti casualty iti probinsiya ti La Union, Rizal, Batangas, Quezon, Mindoro, Negros Occidental, ken Caloocan gaputi insidente ti electrocution, rockslide, ken pannaka-buwal dagiti kayo.
Malaksid kadagiti natay, adda pay ti 19 nga indibidwal ti nailista a nasugatan idinto a tallo ti agtultuloy a masap-sapol idiay Quezon City, Manila, ken Batangas.
Mapatta-patta nga umabot metten ti 8 milyon a tattao wenno nasurok-kumurang 2.3 milyon a pamilya ti naapektaran ti dakes a panawen iti naduma-duma a paset ti pagilian, kabilang iti nasurok 25,800 nga indibidwal nga agtaltalinaed pay laeng kadagiti evacuation center.
Umaboten iti P6.11 bilyon ti nailista a nadadael kadagiti imprastraktura bayat a P2.32 bilyon ti pukaw iti sektor ti agrikultura.
Kabayatanna, umaboten ti ti 3,000 a babbalay ti naideklara a nadadael a pakairamanan iti 349 a totally damaged, bayat a 117 a local government units ti nagdeklara ti state of calamity.
Siniguro ti gobyerno nga agtultuloy ti panagipatulod ti tulong ken umaboten iti P1.65 bilyon a balor ti relief assistance ti naibunong kadagiti apektado nga umili.
