Nangisayangkat iti tignay-protesta ti sangwanan ti Chinese Embassy idiay Makati City dagiti grupo nga Alab ng Bayan ken Filipinos Do Not Yield, kagiddan ti panagrambak iti Aldaw dagiti Nailian a Bannuar.
Tarigagay iti grupo a kondenaren iti panakibiang ti China kadagiti kabaybayan a sakop ti Pilipinas, partikular iti waragawag da a maikkaten ti BRP Sierra Madre idiay Ayungin Shoal.
Impaganetget da a saan a rumbeng a makibiang ti China kadagiti desisyon iti Pilipinas, nangruna nu maipapan iti panangimaton ti bukod a teritoryo.
Pagaammo nga agserserbi kas outpost ti Pilipinas iti BRP Sierra Madre ken simbolo daitoy iti panagwaywayas, soberanya, ken karbengan iti baybay.
Kiniddaw da manen iti panagtalaw ti China idiay West Philippine Sea ken isardengen iti panangbully kadagiti mangngalap a Pilipino kasta met dagiti opisyales ti gobierno ti pagilian.
Dinayaw met iti grupo ti Philippine Coast Guard, dagiti soldado, opisyales ken dadduma pay nga ahensya ti gobierno, kasta met dagiti mangngalap, nga agtultuloy iti panagtignay da para iti karbengan ti pagilian idiay West Philippine Sea.
