BR LA UNION – Posible a marikna dagiti konsyumer inton Nobyembre ti kissay iti singir ti kuryente gaputi pannaka-ikkat ti 12% value-added tax (VAT) iti allowable system loss charges dagiti power utility.
Segun iti Energy Regulatory Commission (ERC), nakitaripnong da kadagiti stakeholder idi Biyernes tapno maplantsa dagiti mekanismo para iti implementasyon ti baro nga allagaden ti Bureau of Internal Revenue (BIR).
KInuna ni ERC Chairperson Francis Saturnino Juan a target da nga ipatungpal ti pannakaikkat ti VAT iti system loss charge para iti nakonsumo a kuryente iti bulan ti Oktober, a makita iti bill a maawat dagiti consumer inton Nobyembre.
Iti sidong ti Revenue Memorandum Circular No. 97-2026 ti BIR a naiurar idi Setyembre 14, saanen a patawan ti 12% VAT iti system loss charges babaen iti limitasyon nga intuding ti komisyon.
Nupay kasta, inlawlawag ti ERC a VAT laeng iti system loss charge ti maikkat ken saan a ti mismo a system loss charge.
Iti system loss charge ket mangibagbagi iti gastos nga adda pakainaiganna Iti mapukaw ti kuryente bayat a maipatpatulod wenno agturong iti power system.
Sabali daytoy iti generation, transmission ken distribution charges a regular a makitkita iti electricity bill.
Segun kenni Juan, saan a mabalin nga ikkaten ti VAT iti dadduma a paset ti electricity bill agsipudta itudtuding daytoy ti linteg.
Mapatta-patta a P20 agingga P30 iti VAT component ti system loss charge a mabalin a maikkat iti bill dagiti consumer.
Nupay kasta, mabalin nga agbaliw iti aktuwal a masalimetmet depende iti konsumo ken iti pakabuklan a singir ti tunggal consumer.
