BR LA UNION – Kinumpirma ni Finance Secretary Frederick Go a pinirmaan nan iti resolusyon a mangikkat ti excise tax iti LPG ken kerosene, kas sungbat iti agtultuloy a panagngato ti presyo ti lana.
Iti panagdengngeg ti gakat a budget ti Department of Finance (DOF) idiay Senado, inlawlawag ni Secretary Go, a ti nasao nga addang ket kapadpada ti naipatungpal idi immuna a timpuar ti krisis idiay Middle East.
Kabayatanna, saan pay laeng nga inaprubaran ti Development Budget Coordination Committee (DBCC) iti panangsuspinde ti excise tax iti diesel ken gasolina. Palawag ni Go, mapatta-patta a ₱12 bilyon kada bulan ti mapukaw a birok ti gobyerno nu maikkat ti buwis iti diesel ken gasolina.
Kinuna na, a pinanunot ti gobiyerno iti maipapaay nga ayuda para kadagiti sektor a kangrunaan nga agkasapolan, kabilang dagiti driver, mannalon, ken mangngalap.
