BR LA UNION – Nakasaganan dagiti security measures nga ipatungpal ti La Union Police Provincial Office (LUPPO) para iti tinawen a Surfing Break idiay San Juan, La Union, maysa nga event a day-daywen ken pakipasetan dagiti lokal nga umili, turista ken bisita manipud nadumaduma a paset ti pagilian.
Segun kenni Police Major (PMAJ) Karol Elizabeth S. Baloco, Public Information Officer ti LUPPO, iti agdama ket plano ti opisinada ti nasapa a deployment dagiti otoridad tapno masiguro ti kinatalged ti publiko kabayatan iti pannakaisayangkat ti naduma-duma nga aktibidad.
Kinuna na a paset ti panagsaganada iti panangrepaso ti kapadasan da kadagiti napalabas a tawen, agraman dagiti addang tapno ad-adda a mapasayaat ti seguridad ita a tawen.
Kabayatanna, binalakadan ni Baloco dagiti turista nga addaan plano nga agpasyar idiay San Juan nga annadan dagiti napapateg a personal a sanikua wenno arwaten, nangruna kadagiti natao a lugar, tapno saan a mabiktima iti mannibrong.
Binalakadan pay ni Baloco dagiti turista nga agbalin nga alerto ken nasirib kontra iti posible nga online scams, partikular dagiti turista nga agpa-book iti hotel, resort, transient house wenno dadduma pay a pagdagusan.
Mabalin a direkta a kontaken ti hotel, resort wenno pagdagusan babaen ti panangusar iti opisyal a contact details-da tapno paneknekan no pudno ti booking page wenno account a maus-usar online.
