Nagpakdaar ni Senator Erwin Tulfo, chairman ti Senate Committee on Energy, kadagiti kompanya ti kuryente kontra iti saan nga inkalintegan a panagpangato iti singir ken nakapsot a serbisyo iti tengnga ti namnamaen nga epekto ti Super El Niño.
Kinuna ni Tulfo a mangisayangkat ti oversight iti Senado nu mapaneknekan nga adda dagiti power generation company ken distribution utility nga aggungundaway iti posible a kinakurang ti suplay tapnu padakkelen iti birok da.
Inallukoy na met iti Department of Energy (DOE) ken Energy Regulatory Commission (ERC) a siguradoen iti umdas a suplay ti kuryente, maliklikan iti rotating brownout, ken maprotektaran dagiti konsyumer kontra iti nakaro a singir.
Maibasar iti panagsukimat ti state weather bureau, namnamaen a pumigsa iti El Niño ken mabalin a dumanon iti lebel a Very Strong manipud Setyembre agingga Disyembre 2026, ken agtultuloy iti umuna a kagudua a paset ti tawen 2027.
