Agtultuloy latta ti panagtrabaho dagiti mannalon nupay agtaltalinaed a dakkel a karit kadakuada ti kinabara ti panawen nga epekto ti El Niño, agsipudta mangigub-gubway daytoy ti panagkurang iti danum a kasapulan iti panagtalon.
Maysa a mannalon ti Barangay Mameltac, San Fernando City, La Union, iti nangipeksa a makapad-padas dan iti kinakurang ti danum a pagsibog kadagiti mula a pagbi-biaganda.
Segun kenni Marvin Catbagan, nga 48 a tawenen a mannalon, nabayagen isuna a mannalon ngem agtaltalinaed latta a parikot da iti kinakurang ti danum, nangruna ita nga agraraira ti phonemanal wenno naisang-sangayan a kinabara ti panawen.
Imbinglay na pay iti plano na a nu malpas iti panagapit ti pagay ket tarigagay na nga agmula ti mais ken nateng.
Ngem gapu iti agtultuloy a kinakurang ti danum, mabalin a maitantan pay laeng ti nasao a plano, agsipudta mabalin a masayang laeng ti gastos ken bannog nu awan met laeng ti umdas a danum nga usaren iti panagtalon.
Kinuna ni Catbagan, a bubon ti kangrunaan a pagtataudan ti danum nga us-usaren da a pagsibog iti mula.
Innayon na, nga iti likudan dagitoy a karit iti panagtalon, inallokoy na dagiti pada na a mannalon nga ituloy ti agmula ken saan a lipatan ti agkararag iti Namarsua tapno agbalin da latta a natibker ken naandur iti sango iti rigat ti panagbiag.
Iti kangrunaan a kiddaw na iti gobierno ket maibaba ti presyo ti gasolina ken diesel, agsipudta dakkel ti epekto na daytoy iti gastos da nga agtalon.
Mangnamnama met nga agtultuloy iti pannakaipaay kadakuada ti abono tapno isu pay a makatulong iti dakkel a gastos dagitoy.
